Read this speech in English here.

Prezidan Comer , Manm Klasman Connolly , ak manm Komite a,

Mwen rele Michelle Wu.

Mwen se pitit fi imigran, e depi Novanm 2021, mwen gen onè pou m sèvi kòm majistra Boston.

Mwen fyè pou mwen isit la nan non vil nou an—ofisye lapolis yo, premye sekouris yo, ak travayè vil yo... lidè relijye yo, pwofesè yo, paran yo, ak vwazen yo—ki mete ansanm chak jou pou fè Boston gwo vil ki pi an sekirite nan nasyon an.

E mwen fyè pou mwen travay ansanm ak pi gwo Komisè Lapolis nan peyi a: Michael Cox .

Chak ane depi lè mwen antre an fonksyon, nou bat yon nouvo rekò ba pou vyolans ak zam nan Boston.

Ane pase, Boston te gen pi piti kantite moun ki mouri ki te anrejistre nan 70 dènye ane yo.

Sa se reyalite yo.

Epi dèyè pi piti rekò sa yo ... gen de rekò ki pi wo nan tout listwa :

Travay pou jèn moun pandan sezon ete ki peye plis kòb pou toutan… plis kantite plas nan lekòl matènèl ki gratis pou fanmi yo… lojman ki pi abòdab ki bati nan yon jenerasyon.

Nou envesti nan jan de opòtinite ki kiltive pwosperite ak elimine krim.

Epi lwa ki nan liv nou yo ankouraje kalite konfyans nan kominote a ki kenbe nou tout an sekirite.

Nan Boston, resous Depatman Lapolis nou yo —ak lajan moun ki peye taks yo —sèvi pou prevansyon ak rezoud krim.

Epi nan zafè koze kriminèl, Lapolis Boston kolabore ak fòs lòd leta ak federal chak jou .

Men lwa Eta Massachusetts … ak Lwa Fideyikomi Boston … klè ke imigrasyon... se responsablite fòs lòd federal li ye.

Nou se gwo vil ki pi an sekirite nan peyi a...

Paske lwa sou zam nou yo se yo ki pi fò nan nasyon an...

Paske ofisye nou yo bati relasyon pandan plizyè dizèn ane ...

Epi paske tout rezidan nou yo gen konfyans yo ka rele 911 lè gen yon ijans oswa pou rapòte yon krim.

Apwòch administrasyon federal sa diminye konfyans sa.

Nan mwa ki sot pase a, mwen te rankontre avèk rezidan ak lidè relijye yo nan kèk sant kominotè ak kote yo adore, m t’ap mande elektè m yo kisa yo vle Kongrè a konnen.

E sa mwen te plede tande se laperèz ak fristrasyon :

Mwen te pale ak pastè ki gen ban legliz yo ki a mwatye vid lè Dimanch...

Doktè ki gen pasyan yo ki ap rate randevou ...

Pwofesè ki gen elèv yo ki pa vin nan klas.

Vwazen yo ki pè rapòte krim nan kominote yo, ak moun ki viktim vyolans ki pap rele lapolis.

Administrasyon federal sa ap fè moun k ap travay di, ki peye taks, ki gen krent pou Bondye ... pè viv lavi yo.

Yon vil ki nan laperèz ... se pa yon vil ki an sekirite.

Yon tè kote laperèz ap dirije ... se pa tè moun ki lib.

Mwa pwochen, Boston pral selebre 250 lane libète nasyon nou an. 

E chak grenn ane sa yo, Boston akeyi mond lan sou rivaj nou yo.

Soti nan imigran Anglè k ap kouri pou pèsekisyon relijye, rive nan Ilandè ki fòse kite akoz grangou ...

Pou fanmi ki soti Ayiti, Repiblik Dominikèn, Kap Vèt, Vyetnam, ak anpil lòt moun ki rele Boston lakay yo jodi a.

Nou se gwo vil ki pi an sekirite nan nasyon an.

Lakay nou gen pi gwo swen sante ...

Pi gwo kolèj ak inivèsite yo ... inovatè ki pi avanse yo ...ak Chanpyon Mondyal 2024 la Boston Celtics.

Nou se bèso demokrasi ak vil chanpyon yo.​

Nou tout bagay sa yo pa malgre imigran nou yo... men akòz yo :

Nan sèt moun ki te siyen Deklarasyon Endepandans lan, youn ladan yo te imigran. Nan dènye kat lis jwè Red Sox pou genyen yon Seri Mondyal, nan senk  nan yo, youn se imigran. Tout pwofesè Boston University ki te genyen Pri Nobèl te imigran, eksepte youn.

Jodi a, sou kat rezidan Boston, gen youn ki te fèt yon lòt kote. Pifò ap travay; anpil gen timoun.

Yo tout te chwazi peyi sa kòm lakay yo, paske—tankou manman m ak papa m —yo te kwè sa, isit la...

… Kote ou ye … pa limite kote ou prale …

… Fòs karaktè w … pa gen anyen pou wè ak koulè paspò w …

…Epi jan w travay di an… gen plis enpòtans ke kote w te fèt la.

…Sa— kèlkeswa kote w soti—depi w kontribye, voye je sou vwazen w, epi aplodi ekip lakay ou, ou ka bati yon pi bon avni isit la pou moun ou renmen yo.

Kidonk, pou chak vwazen mwen yo ki nan Boston, konnen sa:

Isit la se pa w ; sa se lakay ou …Boston es tu hogar…Boston se lakay ou...Zhè shì nǐ de jiā .

Sa se vil nou an.

Nou se gwo vil ki pi an sekirite nan peyi a paske nou san danje pou tout moun.

Mèsi.